Eyjan.is

Bréf um rollur, laxveiði, Zeitgeist og eignaupptöku

Eins og rollur

Íslenska þjóðin er líklega ekkert skárri en ráðmenn hennar.

Ráðamennirnir runnu á rassinn með allt sitt; klikkuðu á eftirlitinu, klikkuðu á siðferðinu, klikkuðu á einkavæðingunni, klikkuðu á viðvörunarbjöllum annarra, klikkuðu á eigin viðvörunarbjöllum, klikkuðu á eftirfylgninni í öllum aðgerðum, klikkuðu á sjálfum sér, klikkuðu á öllu.  Íslenska þjóðin virðist vera að sofna á verðinum sem hún setti upp fyrir nokkrum vikum með sambærilegum hætti.  Enda erum við öll undan hvert öðru komin svo ekki við öðru að búast.

Íslenska þjóðin hefur margt lengi verið þekkt fyrir að vera upptekin af sjálfri sér.  Íslenska þjóðin hefur ALLTAF verið eins og ósamstæður hópur af rollum sem vita ekki hvort þær eiga að fara inn í réttina eða út úr henni.

Nú var útifundur í dag og kraftur hans var engan veginn í takt við það sem byggt hafði verið upp.  Nú eru húsmæðurnar heima að baka sörur og kallarnir í Kringlunni með börnunum að kaupa nýjan kjól handa mömmu – á krítina sem eftir er.

Maður bjóst aðeins við því að loksins sýndi þjóðin á sér hreðjarnar og gerði eitthvað.  En einhvern veginn er baráttan orðin slöpp eftir þokkalega fullnægingu á laugardaginn fyrir viku þegar unga lögfræðidísin sagði að við myndum bera þá út þar sem þeir fela sig.

Ætlar þjóðin að tapa sér í laufabrauðsbakstur eða ætlar hún að láta baka sig á 200 gráðum ?

Alla trú hef ég á íslenskri þjóð; en guð einn veit hvenær þjóðin virkilega stóð upp síðast og reis upp gegn óréttlæti.

Hvar er Jón Sigurðsson dagsins í dag ?

— — —

Ef…

Varðandi eftirfarandi:

It is too early to tell exactly how it all will turn out – except it won’t be pretty.

Spurning:

Er það trúverðugt að íslenzk stjórnvöld hafi ekki vitað um mitt ár 2008 að ljótir hlutir voru framundan – eins og kom á daginn fyrir nokkrum vikum?

Umsögn:

Ef stjórnvöld vissu það ekki, þá eru þau óhæf og ber að víkja.

Ef þau vissu það en gerðu ekki neitt, þá eru þau óhæf og ber að víkja.

— — —

Gömul og gleymd kreppa

Ritstjórnargrein í Lögrjettu 16. nóvember 1921. Þar var rætt um fall á gengi íslensku krónunnar og brask með hana. Velt var fyrir sér leiðum til að stoppa gengislækkunina og lausnin var með því að spara:

„Ríkið verður að ganga á undan og taka fyrir öll útgjöld, sem eru ekki bein lífsnauðsyn. Sveitarfélög verða líka að gera það og hver einstaklingur verður að reyna að takmarka eyðsluna eftir megni. Verði þetta ekki gert, fer alt norður og niður. Eitt verðum við þó framar öllu að hafa hugfast. Við megum ekki missa móðinn, því þá fer alt út um þúfu. Og við verðum að framleiða svo mikið sem nokkur tök eru á, og til þess verðum við að neyta allra bragða og nota öll þau framleiðslutæki, sem við höfum ráð á. Aðeins á þann hátt getum við haft von um að grynna á skuldum okkar, og þar er þá sem skórinn kreppir að.“

Seinna eða 22. febrúar 1922 var haldinn fundur á vegum Stúdentafjelagsins í Iðnaðarmannahúsinu og var þar talað um „fjárkreppuna“. Vegna ýmissa misheppnaðra lána og skipakaupa ríkisins, seðlaaukningu og skulda erlendis. Einnig óheppilegt enskt lán um að kenna.

Er þetta eitthvað sambærilegt við það sem við göngum í gegnum í dag? Ekki er ég þó sammála um sparnaðinn í öllu atriði. Það fer eftir því hvar honum er drepið niður.

— — —

Um byggingariðnaðinn

Ég hef saknað þess svolítið að sjá ekki meiri umræðu um það hvernig komið er fyrir  byggingariðnaðinum.  Ef ég man rétt var búið að vara við því  seinni hluta árs 2005 að líkur væru á að það stefndi í offramboð bæði á íbúðarhúsnæði  svo og verslunar- og skrifstofuhúsnæði. Nú vil ég sjá tekna upp umræðu um þetta. Var einhverntíman gerð einhver skýrsla um þetta þ.e. um þörfina? Hvar er hún? Hverjir gerðu hana? Hversu víðtæk var hún? Var hún eyðilögð?  Kom til óeðlilegs þrýstings frá verktökum?  Mér finnst allt í lagi að kafað sé ofan í þessi mál.

Hér á Akranesi eru fleiri hús  á ýmiskonar byggingarstigi sem standa engum til gagns og óvíst hvenær þau verða tekin í notkun. Ég veit að þetta er líka  svona á höfuðborgarsvæðinu. Það er ofboðslega dýrt að byggja svona mikið án þess að koma byggingunni í gagnið. Mér er nær að halda að við þurfum ekki að byggja nema mjög takmarkað næstu 3-4 árin. Hjá hverjum liggja mistökin? Og hver ber ábyrgðina? Kötturinn sagði ekki ég o.s.frv.

Svo er annað mál: Um daginn var talað um bankalánin sem gömlu bankarnir lánuðu í erlendri mynt. Mikið af þessu eru bílalán eða bílasamningar, svo og húsnæðislán. Upp hefur komið sú umræða hvort greiða skuli þessi lán til baka að fullu leyti eða í besta lagi að greiða þessi lán ekki að neinu leyti til baka. Nú er ég enginn sérfræðingur í peningamálum. En ef ég fæ lán í banka verður bankinn að eiga einhverja eign á móti eða einhverja tryggingu til að geta lánað mér. Getur verið að eignin sem upphaflega stóð á bak við þessi lán (þ.e. eignir gömlu bankana) sé ekki lengur til og nýju bankarnir þurfi ekki að standa skil á þessu til eins eða neins? Kannski er ég að misskilja eithvað eða að hugmyndin sé kolröng, en Jafet Ólafsson ráðgjafi kom inn á þetta í fréttatíma nú um daginn. Þetta hljómar afskaplega ólíklega en samt nógu líklega til að kanna hvort einhver möguleiki væri á þessu. Og ef svo er hvert getur þá fólk leitað til að fá svör og réttláta málsmeðferð?

Jæja, læt ég þetta nægja að sinni. Ekki veit ég hvað þú gerir með þessi skrif. En haltu áfram með góðan þátt.

— — —

Laxveiði

Það vekur furðu mína að enginn hafi gert sér ferð upp í Veiðmálastofnun og nálgast veiðibækur áranna 2006, 2007 (sérstaklega) og 2008 fyrir þekktustu laxveiðiár landsins.

Í þessum bókum er að finna nöfn stjórnenda flestra ef ekki allra lífeyrissjóða landsmanna ár eftir ár. Einnig eru þar færð til bókar nöfn stjórnmálamanna  sem og annarra áhrifamanna í íslensku samfélagi. Þarna voru því samankomir – í boði bankanna – eftirlitsaðilarnir, kjörnir fulltrúar almennings, ásamt fulltrúum lífeyrissjóðanna sem bera ábyrgð á að að ávaxta lífeyrissparnað þjóðarinnar „af skynsemi“. Sumir stjórnendur lífeyrissjóðanna þáðu boðstúrana hjá öllum bönkunum og veiddu vikum saman.

Hvar í heiminum yrðu það taldir eðlilegir viðskiptahættir að þiggja slík boð !?

Vinsælustu árnar fyrir þessa boðstúra sem hlupu á hundruðum milljóna árlega eru réttsælis, Laxá í Kjós, Laxá í Leir, Norðurá, Grímsá, Þverá/Kjarrá, Langá, Haffjarðará, Laxá í Dölum, Víðidalsá, Laxá á Ásum, Blanda, Selá og Rangár.

Þá  má ekki gleyma vikulegum ferðum til Kólarskagans í Rússlandi með einkaþotum frá Reykjavík. Kampavín og kavíar. Allt í boði bankans. Ekkert var nógu flott og markmiðið bankanna að toppa hvorn annan í geðveikinni.

Þetta er fróðleg sagnfræði í ljósi aðstæðna. Vonandi kynnir þú þér málið því þú virðist vera sá eini sem þorir.

— — —

 Vissir þú…

Á vef þessara samtaka er að finna síðu undir yfirskriftinni „Vissir þú?“.

Þar er að finna 18 punkta sem eiga að hræða okkur frá Evrópusambandsaðild.
(sjá http://www.heimssyn.is/page_5.html )

Efst á þessum lista er eftirfarandi:

„…samkvæmt ítarlegri skýrslu Hagfræðastofnunar Háskóla Íslands um gengismál, sem gefin var út í febrúar 2006, er íslenska krónan þrátt fyrir allt mun betri kostur fyrir Ísland en evran. Ástæðan er einkum sú að með upptöku evrunnar myndi sjálfstæð peningamálastjórnun heyra sögunni til sem skýrsluhöfundar telja afar mikilvæga fyrir lítið hagkerfi eins og Ísland og vega þyngra en hugsanlegur ávinningur af upptöku hennar.“

Maður hlýtur að spyrja sig hvort að Sigurður Kári og félagar taki hlutverk sitt nógu alvarlega. Kannski ættu þeir bara að hætta þessu?

— — —

Zeitgeist

Þú hefur nokkrum sinnum fengið Jóhannes Björn, sem heldur úti
vald.org, til þín. Ef þú skoðar bók hans Falið Vald og þá sérstaklega
þennan kafla: http://vald.org/falid_vald/kafli08.htm, þá sýnist mér að
hann sé að segja það nákvæmlega sama um peningakerfið og sagt er í
myndinni Zeitgeist: Addendum (fyrsta hluta). Sjá:
http://video.google.com/videosearch?q=zeitgeist+addendum&emb=0&aq=0&oq=zeitgeist+ad#

Það sem kemur fram þar og í bók Jóhannesar um peningakerfið er ansi
sláandi. Ég hef ekki þekkingu til að vita hvort það sem þarna segir er
rétt en mér þætti áhugavert að vita það. Getur þú ekki séð til þess að
hluti þessarar myndar verði sýndur á RÚV og fengið menn með þekkingu
til að ræða efni hennar? Ég er í það minnsta forvitinn að vita hvað
menn sem hafa þekkingu á þessum málum segja um þetta.

Ótrúlega margir hafa séð þessa mynd á netinu og vita ekki hvað þeir
eiga að halda, enda hafa fæstir nauðsynlega þekkingu á peningamálum
til að meta sannleiksgildið. Nú er einmitt tíminn til að upplýsa fólk
um það út á hvað peningakerfi okkar gengur.

— — —

Jóna Jóns

Ég er Jóna Jóns.
Ég var að ég taldi í öruggri vinnu.
Ég er háskólamenntuð 42 ára móðir tveggja unglinga 18 og 15.
Ég átti skuldlausan bíl (losaði mig við hann og tek núna strætó), íbúð með 70% láni frá Íbúðalánasjólði á góðum stað í borginni.
Ég hef alltaf staðið í skilum og á ekki flatskjá.
Þangað til núna.
Búin að missa vinnuna, er föst í eigin íbúð, búin að nurla saman í sparnað sem átti að ganga til barnanna minna, sparnaður að mestu tapaður.
Ég er ekki áhættufíkill.
Ég get ekki staðið í skilum og sennilega þarf ég að leigja íbúðina MÍNA af ríkinu til að hafa þak yfir höfuðið.
Svör frá Íbúðalánasjóði: „Það er betra fyrir þig að vera í vanskilum heldur en að frysta lán… Ef þú getur borgað inná lánið af og til…“
Talaði við félagsmálaráðuneyti – fólkið þar er í sömu óvissu og við – hinn aumi almúgi!
Engin svör.
Framlengja lánið í 70 ár!!!! Ég verð löngu dauð þá og börnin mín erfa skuldir í stað eigna sem forfeður þeirra sköpuðu fyrir einhverjum öldum síðan!!!
Mér var kennt að spara, kenna börnum mínum um hin góðu gildi sem myndi leiða þau á góðan stað í lífinu… Hmmm, góðan stað?
Hvað á ég að segja við börnin sem eru bæði fermd og þurftu að leggja 2/3 af fermingarpeningum í sparnað (af því að ég taldi mig svo flínka í fjármálum)… þau þurfa jú einn góðan veðurdag að kaupa sér íbúð og bíl! Hvaða rugl er þetta í dag?
Ég er óviss um komandi framtíð og mér líður illa.
Mér líður illa af því að ég var varkár og er að súpa seiðið af varkárninni.
Hver getur svarað fyrir Jónu Jóns, Jón Jóns, og mig…

— — —

Eignaupptaka

Í Kastljósi verið að ræða húsnæðismálin, hvað væri búið að gera og hvað þyrfti
að gera.  EINA umræðan er um afborganir. Afhverju talar ENGIN í alvöru um
eignaupptökuna, sem felst í þessu öllu???

Árið 2005 keypti ég íbúð á 22 milljónir.  Sjálf átti ég 10 milljónir eftir að
hafa nurlað í 30 ár! Ég fékk 12 millj. lán í SPRON með föstum 4,15% vöxtum.
Íbúðaverðið hækkaði svo í 25 mill en þar sem ég ætlaði mér að vera hér þar til
börnin væru farin að heiman – eftir 5-7 ár eða svo græddi ég ekkert á því.  Þá
hafði ég hugsað mér að minnka við mig og kannski í fyrsta skipti í lífinu að
eiga afgang af launum en ég er 55 ára.

Afborganir voru í byrjun 51 þúsund á mánuði og allt virðist í lagi þó
verðbólguspá Seðlabankans sem ALLTAF var í kring um 2-4% stæðist nú ekki alveg.

Nú, 3 og hálfu ári seinna er staðan þannig:

Lánið er komið í 15,2 og íbúðarverðið er komið niður  í 18-19mill. Ég er að
reyna að selja en gengur ekki enda selst ekkert. Búið er að segja mér upp í
bankanum og  ég fer á atvinnuleysisbætur eftir 2 mánuði.

Mér er sagt að á NÆSTU 12 mánuðum eða svo muni lánið mitt fara í minnst 18
milljónir, jafnvel enn hærra og verð íbúðarinnar sennilega niður í 16 – 17!!
Eign mín, 10 milljónir, sem eru hreint engi smáaurar fyrir konu sem hefur
unnið úti allan daginn og komið 3 börnum í gegnum háskóla og til manns – er
horfin!!!  bara horfin og engin lætur sér þetta koma við!!!

Mér er líka sagt að ég geti bara búið hér áfram, greitt háar afborganir sem ég
þarf væntanlega að finna mér 2 störf til að hafa fyrir, verði ég svo HEPPIN að
fá 1 starf – hvað þá 2. Þó ég þræli í þessu starfi eða störfum þar til ég
drepst mun ég aldrei gera meir en skrimta og höfuðstóllinn mun halda áfram að
hækka.

Eignin muni svo smátt og smátt hækka í verði aftur, er mér sagt,  en æææ , þá
hækkar líka verðbólgan og þar með lánið mitt ennþá meir!!!!!

Sem sagt – innan árs er ég eignalaus og telst heppin ef ég hef getað haldið í
við afborganir.  Taki bankinn yfir íbúðina má guð vita hvort ég komi út á
sléttu eða jafnvel skulda ennþá.  Þá þarf ég að gera mig gjaldþrota.  Þarna er
ég, sem safnaði, keypti mjög skynsamlega, bara svipt aleigu minni og
ævisparnaði  og allir eru að röfla um afborganir eða lengingu lána!!!!

Nota bene – lengi ég lánið í 70 ár – verður búið að greiða fyrir þessar
12milljónir sem teknar voru að láni,  á vormánuðum 2005, kr. 1.354.824.000

Já- segi og skrifa – einn milljarð þrjúhundruð fimmtíuog fjórarmilljónir
átthundruð tuttugu og fjögur þúsund, miðað við 4,15% vexti og sömu verðhækkun
og hefur verið á síðustu 40 mánuðum, þe., 26%.  Þarna er ekki verðbólguskotið

sem er væntanlegt, tekið með.

Sennilega munum við sem svona erum stödd, bara ganga út eins og gert er í
Ameríku.  Þegar staðan er orðin þannig að stærsti hluti launanna fer í lánin
eða leiguna eins og það mun heita þá – þá göngum við bara út – hættum að borga.
Þá leggst allt endanlega á hliðina segja hagfræðingar ef fólk hættir að borga.

Þetta mun byrja að gerast seint á næsta ári sennilega eða snemma á 2010.
Hvað gerist þá???? það ætla ég ekki að lifa af skal ég segja ykkur.  Íslensk
náttúra mun tilheyra mér sama hvaða banki fer á hausinn og í hana mun ég
leggjast einhverja nógu kalda nótt, „þakka“ fyrir mig og óska ykkur hinum
blessunar.

— — —

Olíufurstinn og KB

Hvað varð um olíufurstann sem keypti í KB banka í sumar?
Gufaði það allt upp í skítalykt?
Mig minnir að hann hafi keypt 5% í KB og allt var klárt í ágúst að mig minnir, en hvað skeði svo?

Veit einhver þetta hefur aldrei verið nefnt eftir að hann var sagður hafa keypt þessi 5% ?

— — —

Ímyndarnefndin

Helstu niðurstöður nefndarinnar er þær að ímynd Íslands er almennt
jákvæð en veikburða og smá erlendis og byggir fyrst og fremst á upplifun
af náttúru en ekki af þjóð, menningu eða atvinnustarfsemi. Nefndin
leggur því til að ímyndaruppbygging Íslands miði að því að skapa jákvæða
og sterka ímynd ekki bara af náttúru landsins heldur einnig af fólki,
atvinnulífi og menningu.

http://www.forsaetisraduneyti.is/utgefid-efni/nr/2904 

• Senda á Facebook

Búlgaría

Björgólfur Thor hefur átt mikil viðskipti í Búlgaríu og var fyrir nokkrum árum útnefndur fjárfestir ársins þar.

Björgólfur hefur haldið sig mikið í hinum nýfrjálsu ríkjum Austur-Evópu. Og á Kýpur.

Í fréttaskýringu í Morgunblaðinu segir að mafían eigi Búlgaríu.

• Senda á Facebook

Um lífeyrissjóði

Gunnar Tómasson, hagfræðingur í Bandaríkjunum, sendi mér þennan pistil í framhaldi af umræðu um lífeyrissjóði í Silfrinu í dag.

— — —

Fyrir aldarfjórðungi átti ég nokkra fundi með Ögmundi Jónassyni og Guðmundi jaka um landsins gagn og nauðsynjar. 

Á einum þeirra komu íslenzk lífeyrissjóðsmál til umræðu. 

Í hnotskurn var afstaða mín þessi:

“Lífeyrissjóðurinn syndir í sjónum í kringum Ísland.“

Hugsunin að baki þessari líkingu var (og er) þessi:

Við lifum af því sem við framleiðum og deilum því meðal þjóðfélagsþegna með ýmsum hætti:

1. Tekjum fyrir framlag vinnandi fólks til framleiðslu líðandi stundar,

2. Fjármögnun samfélagsþarfa með skattlagningu slíkra tekna,

3. Lífeyrissjóðsgreiðslum til eftirlaunaþega,

4. Nýsköpun peninga í bankakerfinu (verðbólgu),

Að teknu tilliti til tekjuskatta eru 1 + 2 + 3 + 4 = nafnvirði þjóðarframleiðslu. 

Starfshópar koma ár sinni mismunandi vel fyrir borð varðandi 3. lið, sbr. eftirlaunalög þingmanna og ráðherra þar sem stærsti hluti eftirlauna er greiddur af ríkinu.  Og er raunar tilbreyting við stefið í 2. lið.
En eðli málsins samkvæmt ber vinnandi fólk (1) byrðina af hlutdeild samfélagsþarfa, eftirlauna, og verðbólgu í þjóðarframleiðslu (2, 3, og 4), enda ekki í önnur hús að venda fyrir þjóð sem lifir af því sem hún framleiðir.

Nútíma peningahagfræðingar og nemar þeirra í Seðlabanka Íslands, verkalýðsfélögum og Alþýðusambandi Íslands kenna allt annað.  Að baki býr rökvilla sem felst í því að hlutverki peninga í verðmætasköpun hagkerfisins er jafnað til hlutverks vinnandi fólks.  Af þessari rökvillu er sprottin m.a. stýrivaxtastefna Seðlabanka Íslands og varðstaða hagsmunaaðila um lífeyrissjóði í núverandi mynd og verðtryggingu.

Það er langt mál og flókið að fara í saumana á rökvillunni sem hefur tröllriðið ríkjandi hagfræðihugmyndum um tveggja alda skeið.

En fremsti hagfræðingur 20. aldar, John Maynard Keynes, lýsti stuðningi sínum við forvera rökvillunnar í 16. kafla General Theory (1936) sem hér segir:

I sympathise […] with the pre-classical doctrine that everything is produced by labour, aided by what used to be called art and is now called technique, by natural resources which are free or cost a rent according to their scarcity or abundance, and by the results of past labour, embodied in assets, which also command a price according to their scarcity or abundance. It is preferable to regard labour, including, of course, the personal services of the entrepreneur and his assistants, as the sole factor of production, operating in a given environment of technique, natural resources, capital equipment and effective demand.

• Senda á Facebook

Í sögulegu samhengi

• Senda á Facebook

Frábært glærusjóv

Hér er stórkostlega áhugavert glærusjóv.

Höfundurinn er Svafa Grönfeldt, rektor Háskólans í Reykjavík.

Fjallar í rauninni um af hverju Íslendingar eru klárari og sniðugri en aðrar þjóðir.

Fjallar um útrásina.

En minnist hvergi á skuldirnar.

Ég mæli eindregið með þessu.

heimurinn_er_undir_utras_svafa_nov_2007.pdf

• Senda á Facebook

Utzon látinn

Danski arkitektinn Jörn Utzon er látinn í hárri elli. Hann er höfundur einhverrar dásamlegustu byggingar í heimi, óperuhússins í Sidney. Þetta var umdeilt hús á sínm tíma, ég man að mikið var skrifað um það í blöð þegar ég var strákur.

Nú er það stundum kallað eitt af hinum sjö nýju undrum veraldar.

Rithöfundurinn Thomas Keneally skrifar þessa grein um óperuhúsið og hvað það gerði fyrir borgina.

• Senda á Facebook

Nokkrir punktar um Stím

Mér var sent þetta.

— — —

Eigendur og bankastjóri Glitnis sverja af sér alla aðild að Stím ehf.

Nú hefur eini eigandi Stíms talað.

Glitnir hafði frumkvæði að lánveitingunni.

Glitnir vildi engin veð nema bréfin.

Glitnir ákvað að „hunsa“ lánanefndina innan bankans.

Glitnir ákvað að „hunsa“ áhættunefndina innan bankans.

Glitnir tapar þúsundum milljónum króna.

Og auðvitað vita Glitnismenn ekkert um stím ehf. – þetta var sjálfstæð ákvörðun almenningshlutafélagsins Glitnis og mannshöndin kom þar hvergi nærri.

Dásamlegt.
http://visir.is/article/20081129/VIDSKIPTI06/333296199/-1

• Senda á Facebook

Greinargerð IMF

Hér er greinargerð Alþjóða gjaldeyrissjóðsins. Sá sem sendi mér slóðina sagði að hefði verið furðu lítið fjallað um þetta:

„Ég er nokkuð hissa á því að ekki hafi meira verið fjallað um IMF skilmálana og greininguna sem er að finna í IMF greinagerðinni, staff report-inu og aðgerðaráætluninni undirrituð af Davíð Oddsyni og Árna Matt.
Ég fann allt þetta efni á heimasíðu IMF og hef litla sem enga umfjöllun séð um þetta nema það sem ríkistjórnin skammtar út hverju sinni.

Þarna er ýmislegt að finna varðandi bankana, stærð og skiptingu þeirra eignir og skuldir. Spá um efnahagslegar stærðir m.a. skuldir  og fjallað er um aðgerðirnar sem búið er að grípa til og í bígerð eru. Lækkun stýrivaxta um miðjan okt er gegnrýnd og það sem mér finnst nú eiginlega merkilegast þá fæ ég ekki annað séð en að það eigi að nota gjaldeyrisvaraforðan til að styrkja krónuna ef með þarf sjá bls 43, liður 28 punktur 3. En það kemur nú ekki heim og saman við það sem okkur hefur verið sagt,

Við ýmsu er varað meðal annars að ekki megi mismuna eftir þjóðerni og að ríkið eigi ekki að yfirtaka meiri skuldir en þeim ber skylda til, við vitum að við það hefur ekki verið staðið, peningar settir í peningamarkaðssjóði og aðtryggja allar innistæður.
Það er bara svo óendanlega margt í þessu“

Slóðin er hérna:

cr08362.pdf

• Senda á Facebook

Silfrið á morgun

Meðal gesta í Silfri Egils á morgun eru Benedikt Jóhannesson, stærðfræðingur og ritstjóri Vísbendingar, Sigurbjörg Sigurgeirsdóttir stjórnsýslufræðingur, Ástráður Haraldsson lögmaður, Katrín Oddsdóttir laganemi, Vilhjálmur Þorsteinsson hugbúnaðarsérfræðingur, Guðrún Heiður Baldvinsdóttir, lektor í viðskiptafræði við háskólann í Gautaborg, Gunnar Axel Axelsson viðskiptafræðingur, Kristinn Pétursson fiskverkandi, Ragnar Þór Ingólfsson verslunarmaður og Vilhjálmur Birgisson, formaður Verkalýðsfélag akraness.

• Senda á Facebook

Bréf um útrásina, HR, ábyrgð, gjaldeyrishöft og allsherjarverkfall

Trúverðugleiki

Trúverðugleiki í stjórnsýslunni? Skiptir hann máli?

Það er ekki verið að kvarta mikið undan því sem ríkisstjórnin hefur gert, heldur fyrst og fremst það sem hún hefur ekki gert og virðist ekki eiga að gera.

Staðan í sinni einföldustu mynd þegar leggja á mat á trúverðugleika stjórnsýslunnar:

1.    Það hafa ekki verið gerðar neinar afgerandi breytingar í stjórnsýslunni í:
a.    Yfirstjórnendateymum viðskiptabankanna!
b.    Seðlabankanum!
c.    Fjármálaeftirlitinu!
d.    Ríkisstjórninni!
2.    Gæti verið einhverjir samtryggingarsjónarmið sem ráði hér ferðinni?
3.    Svo sýnist manni að verið sé að bjóða upp á rannsókn sem skili jafnvel ekki niðurstöðum fyrr en eftir eitt ár!

Geta stjórnvöld virkilega ekki gert betur?

Ef ekki veður brugðist við á ofangreindum sviðum (á skynsamlegan hátt að sjálfsögðu) munum þjóðin einnig upplifa siðferðislegt gjaldþrot og búa í skemmdu þjóðfélagi í framhaldi af því.

Er það þannig þjóðfélag sem við viljum lifa í?

— — —

Þeir bera ábyrgð

Þessir menn eru ábyrgir, það sér það hver maður.

Viðskiptaráðherra hlýtur að vera ábyrgur fyrir falli bankakerfislandsins.

Ekki reyna að halda því fram að hann sé búinn að vera svo stutt í starfi, maðurinn er búinn að vera meira en 1/4 af kjörtímabilinu.

Hvað þarf maður að hafa haft flottan bíl og einkabílstjóra lengi til að bera raunverulega ábyrgð?

Fjármálaráðherra hlýtur að vera ábyrgur fyrir því að Ísland er núna orðin ein af skuldsettustu þjóðum heims. Hvað er hann búinn að vera lengi í brúnni, græða á og skipuleggja mikið af klandrinu sem við erum í ?

Utanríkisráðherra hlýtur að vera ábyrgur fyrir því að ímynd Íslands og samvinna við aðrar þjóðir hefur beðið hnekki án þess að tekið sé á því. Að við virtumst ekki hafa réttar upplýsingar um stöðu okkar meðal annara þjóða í ICESAVE deilunni. Við erum enn í deilu við Breta, hvað er í gangi þar?

Dóms og kirkjumálaráðherra ber ábyrgð á því að það voru ekki snör viðbrögð við hruninu. Afhverju voru t.d. bankastjórarnir kallaðir í yfirheyrslur strax og hrunið gerðist? Afhverju var ekki farið strax inn í bankanna og allt heila klabbið ljósritað?

Forsætisráðherra ber lang mesta ábyrgð á öllu því sem hefur gerst. Hann ber ábyrgð á seðlabankanum og hans verkum. Hann ber ábyrgð á forsögu málsins. Hann ber ábyrgð á öllum lélegu ákvörðunum sem leiddu að þessu stórslysi. Hversu mikil skáldsaga þarf hvítþvottabókin að vera til að hann verði ekki aðalábyrgðarmaður þessa hruns?

Ég held það þurfi ansi langsótta skýringu til að kenna alþjóðlegri fjármálakreppu um allt heila klabbið.

— — —

Útrásin og HR

Ég er nemi í HR. Viðskiptafræðinemi. Það var kennt námskeið í skólanum sem nefnist “útrásin” síðustu árin. Samt ekki þessa önn.
Þar er heill áfangi þar sem 3 einingar fara í því að þekkja leikendur og gerendur í útrásinni svokölluðu. Ég tók þennan kúrs ekki , því miður. Hefði viljað eiga power point glærusjóvið og senda þér.
Það er hægt að skoða á netinu öll námskeið sem kennt hafa verið í skólanum. En það er búið að taka út allt sem tengist þessu fagi “útrásin”. Þau vilja gleyma því að þau hafa nokkurn tímann kennt þetta fag.
Skora á þá nemendur sem fóru í þetta fag að láta power point glærusjóvið berast.
Annars var aldrei efast um útrásina. Í fjármálsögunni var aldrei farið í Asiukrísuna (sem t.d. Tæland lenti í svipuðu og Ísland) eða Finnlandskreppuna. En það var hinsvegar farið í Soros og hvað hann var sniðugur að shorta pundið á sínum tíma.

— — —

Fjórir punktar

Sæll Egill. Já þetta gengur bara alls ekki upp – þetta var virkilega aum varnarræða hjá bankamálaráðherra. Við eigum betra skilið frá honum.

Annars langar mig að nefna hér fjóra punkta svona að kvöldi þessa dags.
Dagsins þegar Alþýðusamband Íslands kom sér loksins að því að segja skýrt og skorinort hverjir eiga að víkja svo launþegasamtökunum verði unnt að koma að samningborði, með von um einhverja tímabunda sátt fram að kosningum – hvenær sem þær verða nú haldnar.

1. Ingibjörg Sólrún sagði í ræðustól á Alþingi í dag að svokallaðir „eldri sendiherrar“ væru of margir hjá utanríkisráðuneytinu. Það er undarlegt að formaður jafnaðarmannaflokksins á Íslandi skuli vega svona að starfsmöguleikum þeirra sem komnir eru yfir miðjan aldur. Að maður nefni nú ekki að Krístín Árnadóttir vinkona formannsins og skipuð var í embætti sendiherra af IGS (til að ekki þyrfti að auglýsa stöðuna) er nú ekkert unglamb sjálf. Hippakynslóðin eldist nefninlega líka! Og stöldrum aðeins við, það eru fleiri fletir á þessu – Er Ingibjörg Sólrún kannski að tala um 90 ára regluna? Að þeir sem eiga 90 ár í samanlögðum lífaldri og starfsaldri og eru í vinnu hjá hinu opinbera geti farið á eftirlaun þótt 67 ára aldri sé ekki náð? Og þannig væri sársaukalaust að losna við þá nokkra. Er það þá ekki hluti af sérréttindum opinberra starfsmanna og þar með talinna alþingismanna sem ætti að skoða með eftirlaunafrumvarpsklórinu?

2. Björgvin G. Sigurðsson sagði á Stöð 2 í kvöld að hann vilji bíða niðurstöðu rannsóknar áður en hann taki á sig einhverja sök. Samkvæmt fréttum mun það taka u.þ.b. 12 mánuði að fá niðurstöðu í þessa rannsókn. Og ef við tökum dúett Björgvins með Þórunni Sveinbjarnardóttur um að kjósa þurfi fljótt á nýju ári þá verða þær kosningar haldnar áður en niðurstaða rannsóknarinnar verður birt. Er þá ekki alveg jafngott að hann axli strax ábyrgð sína á vanrækslu / getuleysi í starfi og segi af sér nú þegar eins og Alþýðusamband íslands krefst og almenningur tekur vel undir. Að sjálfsögðu ber hann ábyrgð á undirmönnum sínum í Fjármálaeftirlitinu og á að reka stjórn þess áður en hann sýnir þjóðinni allri þann sóma að hverfa á braut.

3. Alþjóðagjaldeyrissjóðurinn metur það svo að eignir erlenda hluta gömlu bankanna þriggja nægi aðeins til að greiða um helming skulda vegna Icesave reikninganna. Ingibjörg og Geir löptu það beint eftir Björgúlfi gamla að eiginirnar ættu að duga fyrir öllum skuldunum! Held að þau þurfi að vanda val sitt mun betur á heimildarmönnum í framtíðinni.

4. Og svona til að halda því til haga þá er Geir Haarde sem forsætisráðherra sá ráðherra sem ber ábyrgð á öllum embættisfærslum formanns stjórnar Seðlabanka Íslands, Davíð Oddssyni og ætti með réttu að víkja sjálfur embætti ásamt Árna Matthiesen fjármálaráðherra og Björgvini G. Sigurðsyni. Að sjálfsögðu gildir það saman við Geir og Björgvin hér að ofan að það væri rétt í stöðunni að losa þjóðina við Davíð og co áður en hann færi frá.

— — —

Allt er matur

Sæll minn kæri.

Er ekki tækifæri núna til að skylda fiskiskip okkar til að koma heim með undirmálsfisk, (brottkast) og gefa þeim illa stöddu í þjóðfélaginu. Í slíku ástandi er allt matur og munar um allt.

— — —

Niðurfelling skulda fyrir fjárglæframenn

Er ekki athygli fjölmiðla of mikil einstefna, beinist nær eingöngu að stjórnkerfinu, ég er ekki þar með að segja að eigi ekki að veita því strangt aðhald og spyrja spurninga.  Við sjáum bara hvað er að gerast í samfélaginu t.d. í sambandi við TM og STIM.  Meðan kastljóst fjölmiðla og sjálfskipaðra leiðtoga mótmælenda, þeirra sem m.a. eru með Davíð á heilanum, beinist að stjórnvöldum og stjórnkerfinu, ganga fjárglæframennirnir óáreittir sem aldrei fyrr og kaupa upp eignir sem þjóðin hefur eignast í kjölfar bankahrunsins á spott prís og fá niðurfellingu skulda í kaupbæti án þess að nokkur veiti því athygli.  Maður veltir því fyrir sér hvort þetta sé úthugsaður leikur, þessara sömu aðila, sem eiga fjölmiðlana.

Einnig var mér hugsað þeirra SMS skilaboða sem fjölmiðlafulltrúi Glitnis sendi Vilhjálmi Bjarnasyni, sem hann las upp úr í þættinum hjá þér sl. sunnudag, þessi framkoma er alveg ótæk af hendi fjármálastofnunar sem vill láta taka sig alvarlega.  Að hann sé enn að störfum fyrir bankann eftir þá útreið sem hann fékk í norska sjónvarpinu á dögunum er auðvita sér kapituli út af fyrir sig og getur varla verið bankanum til framdráttar.

— — —

Aðeins um peningamarkaðssjóði

Eins sorglegt og allt það mál er hlýtur maður að spyrja hverjir eigi að borga þessar kröfur sem þessi hópur setur fram?
http://www.dv.is/frettir/2008/11/28/osatt-vid-landsbankann/
Vill þessi hópur að sjóðirnir séu gerðir upp með réttmætum hætti, þ.e. þær 200 milljarðar sem settir voru inn í þessa sjóði (og mest hjá Landsbankanum) verði teknir aftur út (almenningur hlýtur að gera þá kröfu).  Þegar forsprakkar þessa hóps komu í Kastljós á dögunum „gleymdi“ Sigmar að spyrja þeirrar spurningar.
Afhverju getur Björgvin G. ekki gefið út þau viðskiptalegu sjónarmið sem liggja að baki því að setja fé inn í þessa sjóði.  Þarna er um gróflega mismunun að ræða sem getur ekki verið réttlát.
Það er sorglegt að fólk tapi af sparifé sínu, en það er ósanngjarnt að bæta  bara sumum upp það tap.  Ef bankarnir hafa selt þessa sjóði á fölskum forsendum þarf að draga viðkomandi aðila til ábyrgðar og dæma þá fyrir dómstólum, en EKKI láta skattborgara borga það tap.  Það sér það hver maður að það er ósanngjarnt.

— — —

Gjaldeyrishöft

Ég verð að segja það sem ég segi daglega þessar vikurnar.  Á dauða mínum átti ég von en ekki þessu!  Gjaldeyrishöft lögleidd að nýju!  Nú styttist í að maður verði að sækja um til framsóknarmannanna.  Eitt par af bússum takk! (Þeir sem ekki vita þá voru þetta einskonar gúmmístígvél!)  Nú má rekja gamlar þjóðsögur af bændum sem sóttu innflutningsleyfi fyrir vöðlum en fengu ekki þar sem þeir voru ekki sjómenn!

Fjandakornið, það verður að stöðva stjórnmálamenn.  Hér er verið að koma upp ríkisfasisma að nýju, helmingaskipti hin seinni.

Og þetta er ekki einhver skoðun rugludalls, þetta er raunverulega að gerast.

— — —

Skálkaskjól fyrir pólitíkusa

Ráðherrar segjast ætla að bíða úrskurðar rannsóknarnefndarinnar áður en þeir ætla sér að horfast í augu við ábyrgð sína.

Það getur nú varla talist göfugt af þeim enda stilltu þeir upp hvernig nefndin eigi að vera samansett og hvert rannsóknarviðfangsefnið er. Erfitt er að sjá fyrir sér hvernig þessi nefnd muni skila nokkru sem orðum tekur að nefna. Öllu ríkisapparatinu tókst eftir 6 ár og marga hringi að klína einum dómi uppá Jón Ásgeir og co. Hvað ætlast menn til þessi nefnd geti skilað af sér.

Sérstaklega ef maður tekur tillit til þess að nefndin hefur það að meginmarkmiði að skoða fall bankanna, ergo lögbrot, en það kemur ekki fram að hún eigi að skera úr um politíska ábyrgð. Það er ekki lögbrot að fara út í heim að prómótera Ísland þegar menn vissu betur, það er ekki lögbrot að tala um að fólk hafi verið að hræða niður krónuna, það er ekki lögbrot að reyna að festa gengi krónunnar eða tiniður til lkynna um lán áður en vilyrði liggur fyrir.

Ennþá síður er það lögbrot að ráða menn til að spinna sig frá þjóðinni, vera blindur á hið augljósa, tala niður til almennings og ignora bakvið vilja mótmælenda.

Allt sem snertir upplifun þjóðarinnar á stjórn sinni er ekki hægt að mæla og því er þessi nefnd ekki til þess fallinn að valda sáttum í íslensku samfélagi. Hún er í besta falli hæf til þess að pólítíkusarnir geti falið sig á bakvið hana og hangið á völdunum.

— — —

Einkennileg þjóðfélagsmynd hins nýja Íslands

Fyrst eyðileggja bankarnir krónuna með framvirkum samningum  stöðutökum og öðru svindli. Eigið féð eykst um stundarsakir og bókhaldið virðist í lagi.
Krónan hríðfellur langt niður fyrir  söguleg mörk. 20% heimila og 75% fyrirtækja  á leið í gjaldþrot. Krónusvindlið kemur í bakið á bönkunum og þeir ráða ekki lengur neinu í spilinu. Fá ekki fjármögnun því enginn treystir þeim.
Ríkið yfirtekur bankana og  krónan fellur   meira og er nú de facto verðlaus. 20% heimila og 80% allra fyrirtækja urðu  því gjaldþrota 9 október s.l. Handhafar ríkisvaldsins aðhafast ekkert í 8 vikur. 1.desember n.k. mælist verðbólga 20% og verðtryggð lán hækka sem því nemur; 80% heimila og 93% fyrirtækja nú de facto gjaldþrota.

Hinir nýju “ ríkis“ bankar eiga nú nær öll  íbúðarhús og 95 % fyrirtækja í landinu. Þeir sem skulda ekkert í húsinu sínu komast hvergi af því þjóðlífið er að lamast. Nýju “ ríkis“ bankarnir greiða kröfuhöfum gömlu bankanna hinsvegar ekkert eða á mjög löngum tíma eða IMF og skattborgararnir lofa að greiða skuldirnar fyrir þá.

Heilög Jóhanna tilkynnir að þeir sem missi heimili sín fái að leigja þau eftir að hafa misst þau, tilkynnir einnig greiðslujöfnun og bíður fólki að borga miklu meira en bara aðeins seinna. Boðar lög um sveigjanleg gjaldþrot en fyrningarfrestur kröfuréttinda  er áfram óbreyttur ( en honum var breytt í fyrra með nýjum lögum um fyrningarfrest sem rýmkaði rétt kröfuhafa verulega ).
Undarlegt finnst mér að bankarnir sem eyðilögðu krónuna og atvinnulífið með svikum skuli nú standa uppi með pálmann í höndunum. Miklu hærri kröfur á fyrirtæki og heimili ( góð ávöxtun  og nýtt eigið fé ). Getur verið að þetta standist alþjóðalög?  Að bankarnir sem ákváðu  gengi krónunnar með misferli og svindli geti haldið upp á fólk og fyrirtæki lánum m.v. gengi sem bankarnir ákváðu með svindli og misnotkun. Í gegnum svindlið þjóðnýta “ nýju“ bankarnir öll heimili í landinu og öll fyrirtæki og eyðileggja margra ára “ uppskeru“.

Samt  virðast þeir sitja  uppi sem sigurvegarar. Gagnvart  venjulegum skuldurum ( heimilunum ) gilda öll gömlu lögin eins og  bankarnir hefðu aldrei valdið plágu en gagnvart þeim sem töpuðu markaðsbréfum. hlutafé og vinnunni eru bankarnir skv.  neyðarlögum algjörlega ábyrgðarlausir. Afhverju virkar verðtryggingin á neyðartímum eða mælieiningin gengislán ??
Eru þetta ekki brostnar forsendur. Eiga þeir sem svindluðu að hagnast á því ?? Þeir halda vinnunni er það ekki nóg ? þurfa þeir að eignast heimilin líka ??

Síðast í gær breytti SPRON ( nýkomin í ríkiseigu ) EINHLIÐA “ gengis“ lánum í krónulán þannig að sá sem skuldaði 25.000.000 í íbúðarláni í febrúar s.l. skuldar nú frá 50.000.000 upp í 75.000.000. Samt er engin af þessum bönkum að borga eitt né neitt í útlöndum.

Er þetta ekki stærsta þjóðnýting sögunnar?? Stalín kemst ekki nálægt þessu og Mao ekki heldur. Það er aðeins eitt orð yfir þetta; fasismi.

— — —

Force Major

Ég hef verið að velta fyrir mér máli eigenda fasteigna og annarra sem tóku gjaldeyrislán hjá  bönkunum.  Það virðast allir gera ráð fyrir að kostnaður vegna falls krónunnar lendi á skuldurunum en bankinn sé með allt sitt á þurru eins og alltaf.  Ég tel að skuldarar geti beitt fyrir sig “Force Major”.  “Force Major” er ákvæði t.d. í verktakarétti og tryggingarétti sem verktaki eða tryggingafélag getur beitt fyrir sig ef upp koma sérstakar óviðráðanlegar aðstæður  sem verktakinn (tryggingafélagið) ber ekki ábyrgð á svo sem styrjöld, óeirðir, hryðjuverk, uppþot, verkfall, náttúruhamfarir, verkbann eða opinber höft.

Þegar fólkið fékk lánin hjá bönkunum þá fór það í greiðslumat og bankinn samþykkti að lána þeim þar sem þau höfðu alla burði til að standa í skilum miðað við eðlilega þróun verðlags og gengis.  Segjum svo að allar aðstæður þessa fólks séu óbreyttar frá því að bankinn samþykkti þau sem hæf til að taka þetta lán.  Þrátt fyrir það ráða þau ekki við að greiða af láninu vegna falls krónunnar sem stafar af erlendri bankakrísu, falli bankakerfisins og beitingu hryðjuverkalaga í Bretlandi.

Ég legg til að fólk sem er í þessum aðstæðum skrifi bankanum bréf þar sem það ber fyrir sig “Force Major” og hafni að bera ábyrgð á hækkun á greiðslubyrði lánanna og borgi aðeins það sem það hefði þurft að gera ef þróun gengis hefði verið eðlileg.  Til að tryggja sig fyrir áfalli ef þetta gengur ekki upp gæti það lagt mismuninn á fullri greiðslu og “eðlilegri” inn á biðreikning.  Bankinn myndi að sjálfsögðu mótmæla þessum rökstuðningi fólksins og þau myndu enda með prófmál fyrir hæstarétti með gjafsókn frá ríkinu.

Ég er ekki með gjaldeyrislán, sem betur fer, þ.a. ég get ekki gert þetta sjálfur.

— — —

Allsherjarverkfall

Ég hef eins og aðrir verið að velta því fyrir mér hvað er til ráða í lýðræðisríki þegar kjörin stjórnvöld hlusta ekki á fólkið, kalla það skríl og segja bara ekkert að marka skoðanakannanir því það eigi bara að taka mark á einni skoðanakönnun á fjögurra ára fresti.

Mótmæli eru gagnslaust vopn nema í þjóðfélagi þar sem stjórnvöld vita að þau eru aðeins fyrsta skrefið í aðgerðum. Aðvörun. Nokkurs konar „GAS,GAS,GAS“ fólksins. Sjórnvöld verða að óttast mótmæli til að þau bíti.

Ef stjórnvöld vita að mótmælin lognast bara útaf eftir nokkur skipti, þá er ekkert mark á þeim takandi. Þetta er þá bara sunnudagslabbitúr á Laugaveginum og ráðherrar geta látið út úr sér aðra eins vitleysu og að þeir myndu nú bara vera til í að taka þátt í þeim.

Hvaða vopn hefur þá fólkið til að fylgja eftir mótmælum? Þar sem svo langt er um liðið síðan slíkt gerðist hér tók það mig dálítinn tíma að muna hvert næsta skref er: Allsherjarverkfall.

Að minnsta kosti hef ég ekki áhuga á að vinna fyrir þetta fólk (þótt óbeint sé), eða veita því frekari fjárráð gegnum skattana mína.

ps. Þess má geta að ég er staddur í Berlín til þess að selja fasteign. Peningana verð ég svo að koma með heim, sökum þjóðernis míns, um leið og mér berast þeir ellegar borga allt að 20 milljónum í sekt.

Bestu kveðjur frá hræddum þegn

• Senda á Facebook