Þínar fréttir, þín skoðun

Rússneskir sjóliðar af seglskipi

Rússneskir sjóliðar ganga um í rigningunni hér í Reykjavík, heldur þungbúnir á svip. Ég efast um að þeir hafi efni á að kaupa margt í búðum hér eða veitingahúsum.

Glaðlyndu stúlkunni sem afgreiðir í Krambúðinni fannst þeir heldur fúlir og spunnust af því nokkrar umræður í búðinni. Ég sagði að Rússar væru almennt ekki þekktir fyrir glaðvært viðmót.

En það er svosem ósköp grátt hérna úti, þótt hitastigið sé frekar hátt. Samt ekki jafn grámyglulegt og í Múrmansk en einn sjóliðinn sagði mér að þangað væri skipið þeirra að fara.

Múrmansk þykir einhver daprasti staður á norðurhveli jarðar.

Skipið sem Rússarnir eru á heitir Sedov og mun vera eitt stærsta seglskip í heimi. Það liggur við Miðbakkann og möstrin á því gnæfa yfir borgina.

Ég skrifaði að koma skipsins hingað tengdist kannski valdatöku Alþýðubandalagsins, en ég var bara að bulla.

• Senda á Facebook

Alþýðubandalagið kemst til valda

Steingrímur J. Sigfússon, Ögmundur Jónasson, Árni Páll Árnason, Össur Skarphéðinsson, Guðbjartur Hannesson, Katrín Júlíusdóttir, Svandís Svavarsdóttir.

Allir þessir ráðherrar eru upprunnir í Alþýðubandalaginu.

Jóhanna Sigurðardóttir getur talist bona fide Alþýðuflokkskona þótt hún hafi farið í Þjóðvaka. Pabbi hennar og amma voru bæði í Alþýðuflokknum.

Katrín Jakobsdóttir er eiginlega of ung til að hægt sé að kenna hana beint við Alþýðubandalagið en hún er samt þeim megin í tilverunni – og svo þekki ég ekki nógu vel pólitískan uppruna Jóns Bjarnasonar.

En Alþýðubandalagið hefur greinilega náð völdum í landinu, tíu árum eftir að flokkurinn var lagður niður.

Sama dag er risastórt rússneskt skip í höfninni.

Það hefði einvern tíma vakið skelfingu – var ekki meira að segja bók skrifuð hér um árið um valdarán Alþýðubandalagsins?

• Senda á Facebook

Grein fjögur

Í yfirlýsingu vegna breyttrar ríkisstjórnar Jóhönnu Sigurðardóttur eru nefnd tuttugu atriði. Sumt eru almælt tíðindi, annað er nokkuð merkilegt. Þar á meðal grein númer fjögur:

„Lög um stjórn fiskveiða endurskoðuð á grunni niðurstöðu sáttanefndar og breytingar á stjórnarskrá (sameign á auðlindum) tryggðar. Þjóðaratkvæðagreiðsla um kvótakerfið undirbúin ef ekki næst viðunandi sátt.“

Þarna er gefið sterkt fyrirheit um að framtíð fiskveiðistjórnunarkerfisins verði ákveðið í lýðræðislegri kosningu – en um leið er þetta eins og svipa yfir nefndinni sem nú er að störfum og á að finna tilhögun sem getur orðið sátt um. Ef hún stendur sig ekki, þá fær þjóðin að ákveða.

Athygli vekur að í yfirlýsingunni er ESB ekki nefnt á nafn né heldur aðildarviðræður við sambandið. Er það tilviljun eða er það gert til að hlífa tilfinningum VG-ara?

Hins vegar er sagt að fækka eigi ráðuneytum enn frekar – þannig að Jón Bjarnason þarf kannski ekki að kemba hærurnar í ráðuneyti sínu.

• Senda á Facebook

Hakkarar ráðast á DV

Tölvuhakkarar munu hafa ráðist á vef DV. Þannig birtist nú viðvörun þegar farið er inn á vefinn. Eftir því sem mér skilst er samt óhætt að fara þangað inn. En það er spurning hverjir standa í því að ráðast með þessum hætti á þennan vefmiðil?

• Senda á Facebook

Orkuveitan og Landsvirkjun, upp á náð og miskunn lánadrottna

Í Morgunblaði dagsins er úttekt á stöðu orkumála á Íslandi. Þar segir að ekki sé beinlínis hætta á að missa eignarhaldið á Landsvirkjun eða Orkuveitu Reykjavíkur, lög koma í veg fyrir það, en hins vegar eru þessi fyrirtæki landsmanna að miklu leyti að vinna fyrir erlenda lánadrottna. Peningarnir sem koma inn fara í að borga lán og vexti.

Meðan svo er virðist vafasamt að hægt sé að ráðast í mikla uppbyggingu.

• Senda á Facebook

Obama leitar friðar í Miðausturlöndum

Thomas L. Friedman, dálkahöfundurinn frægi sem skrifar fyrir New York Times, segir að Obama forseti sé að reyna hið ómögulega í Miðausturlöndum, bæði í Ísrael/Palestínu þar sem hann reynir að koma á friðarviðræðum á nýjan leik og í Írak þar sem hann reynir að stilla til friðar milli súnnía og shía-múslima. Friedman segir að öfgamenn muni reyna að sjá til þess að forsetanum mistakist:

„President Barack Obama is embarking on something I’ve never seen before — taking on two Missions Impossible at the same time. That is, a simultaneous effort to heal the two most bitter divides in the Middle East: the Israeli-Palestinian conflict and the Shiite-Sunni conflict centered in Iraq.

Give him his due. The guy’s got audacity. I’ll provide the hope. But kids, don’t try this at home.

Yet, if by some miracles the Israeli-Palestinian peace talks that open in Washington on Thursday do eventually produce a two-state solution, and Iraqi Shiites and Sunnis do succeed in writing their own social contract on how to live together, one might be able to imagine a Middle East that breaks free from the debilitating grip of endless Arab-Israeli wars and autocratic Arab regimes.“

“

• Senda á Facebook

Léttstrætóar og samgöngumiðstöð

Hugmyndir borgarstjórnar um létt-strætisvagna sem ganga ótt og títt um Miðborgina er mjög athyglisverð. Reyndar mætti vel athuga að hafa slíkt létt-strætóakerfi víða um borgina. Stærri vagnar gætu kannski gengið á álagstímum, minni vagnar þegar færra fólk er að ferðast.

Íslendingar sem hafa ferðast erlendis hafa kynnst strætisvagnakerfum af þessu tagi, til dæmis í Bodrum í Tyrklandi.

Verði þetta að veruleika er rætt um að Hlemmurinn hætti að vera miðstöð strætisvagnaumferðar í vesturborginni heldur verði það BSÍ. Þá mætti jafnvel hugsa sér að Hlemmurinn þróaðist smátt og smátt í það að vera almennilegt torg, en ekki þessi dapri staður sem nú er. Þá þyrfti að rífa forljótt strætisvagnaskýlið sem er á miðjum Hlemminum.

En hvað varðar strætisvagna er þetta eðlilegra, því þannig næst tenging við umferð langferðabifreiða.

Það eru gerðar miklar kröfur til Besta flokksins um að gera róttækar breytingar í Reykjavík. Hann getur ekki starfað eins og hinir flokkarnir sem eru samdauna kerfinu og eru afar svifaseinir. Páll Hjaltason, formaður skipulagsnefndar, talaði einmitt í þessa veru í viðtali við Fréttablaðið í síðustu viku.

Eitt af því sem hlýtur að þurfa að skoða í þessu sambandi er samgöngumiðstöðin svokallaða við Reykjavíkurflugvöll. Þetta hefur verið hjartans mál Kristjáns Möller samgönguráðherra, en það var forveri hans sem samdi upphaflega um samgöngumiðstöðina við R-listann. Það hefur verið látið eins og húsið verði notað í annað ef Reykjavíkurvöllur verður lagður niður.

Kannski hefur borgarfulltrúum fundist að það væri hvort eð er búið að vinna slík spjöll í Vatnsmýrinni – að eitt stórhýsi til skipti engu máli.

En það er ljóst að samgöngumiðstöðin verður aldrei miðpunktur fyrir umferð strætisvagna og varla langferðabifreiða heldur. Og það er líka ljóst að flugumferð er að minnka verulega – nú er fólk farið að keyra unnvörpum til Vestmannaeyja, það er komið malbik alla leið til Ísafjarðar og flugið er líka ansi dýrt.

Kristján Möller virðist vera á leið úr ríkisstjórn og það er ekki ósennilegt að þetta hugsjónamál hans fari um leið út um gluggann. Kristján gæti líka orðið fyrir öðrum vonbrigðum, því þá eru varla horfur á að hann fái að baða sig í frægðarljóma í heimabyggð sinni nyrðra þegar Héðinsfjarðargöng verða opnuð.

En það eru reyndar teikn á lofti um að Kristján ætli ekki að fara þegjandi og hljóðalaust úr ráðuneytinu. Jón Bjarnason hefur líka sýnt að það skilar ágætum árangri að streitast á móti.

• Senda á Facebook

Skuldaskil Björgólfs

Björgólfur Thor og áróðursmenn hans sögðu að hann ætlaði að greiða skuldir sínar að fullu.

En í heimi hinna stóru viðskipta er svonalagað voða afstætt.

Að minnsta kosti ef marka má þessa frétt Stöðvar 2.

• Senda á Facebook

Vonir bundnar við Ögmund

Málefni innflytjenda hafa verið í miklum ólestri hér – síðast kom upp mál brasilískrar konu sem hafði verið gift Íslendingi, skildi við hann og fær þá ekki lengur að vinna á frístundaheimili. Því miður er alltof algengt að erlendu fólki sem hér hefur búsetu sé sýnd óvirðing og jafnvel valdníðsla.

Þess vegna hljóta að vera miklar vonir bundnar við Ögmund Jónasson í hlutverki dómsmálaherra. Lengi vel hefur helst enginn mátt gegna þessu djobbi nema hann sé í Sjálfstæðisflokknum og útskrifaður úr lögfræðinni vestur á Melum. Ögmundur ætti að koma með ný viðhorf inn í ráðuneytið. Nánustu stuðningsmenn hans gera ábyggilega ráð fyrir því.

Það þarf til dæmis að taka til hendinni í þeirri leiðu stofnun Útlendingaeftirlitinu – og svo eiga Íslendingar að geta tekið miklu betur á móti flóttamönnum.

Sumir verða þó kannski áhyggjufullir yfir þessu, eins og til dæmis einn aðalmaðurinn á Moggablogginu sem gjarnan er vitnað til í Staksteinum og óttast að múslimar verði komnir í meirihluta á Íslandi innan tíðar, sérstaklega þó ef við göngum i ESB.

• Senda á Facebook

Tillaga um að slíta aðildarviðræðum hefur ekki meirihlutafylgi

Samkvæmt DV hefur ríkisstjórnin engu að tapa með því að hleypa í gegn þingsályktunartillögu um að aðildarviðræðum við ESB verði slitið.

DV kemst að þeirri niðurstöðu að 36 þingmenn muni greiða atkvæði á móti tillögunni en 24 séu fylgjandi henni.

Það munar um hóp þingmanna úr stjórnarandstöðunni sem vill halda aðildarviðræðunum áfram.

Um tillöguna munu náttúrlega spinnast talsverðar umræður í þinginu, en ef fer sem horfir verður hún frekar til að styrkja aðildarviðræðurnar en hitt.

• Senda á Facebook